A roda do ano: un proxecto de equipo para este 2017/18

O Correo Galego faise eco do proxecto no que comezamos a fuchicar esta mesma semana: A Roda do Tempo. Unha reflexión sobre o uso que facemos do tempo, particularmente do que adicamos ó noso entorno, a nós mesmas e á nosa xente; unha apelación a non perdernos nas redes sociais e o mundo virtual e, pola contra, repensar o noso papel na natureza e na sociedade. Como eixo vertebrador empregaremos o calendario celta, quen dado o seu apego á terra organizaban as súas festividades en torno a 8 eventos vencellados co sol, o cultivo e a recolleita.

Fin de curso

Chegamos ó momento da despedida por este curso. Foi un ano cheo de actividades, aquí tedes un vídeo que dá conta de algunha delas.

No acto de despedida disfrutamos dos estupendos concertos do alumnado de música, vimos proxeccións das mellores pezas do ano e entregáronse os diplomas. Fotos:

Fin de curso 2017

Ademais, presentouse en primicia a peza Ruta Translatio que dirixiron Marina Ramallo e Sofía Otero e realizou o alumnado de 3º e 4º do Club do Antifás. Un fermoso agasallo de despedida!!

Gañamos un Olloboi!!

O grupo de Sergio, Carlos, Alicia, Elisa e Carla, de 2ºAB gañaron o premio Olloboi ó mellor guión, exaequo co IES As Barxas, pola súa curta Máis che vale non ser ti. Parabéns!

Ademais, 30 rapaces e rapazas do Club do Antifás participaron na actividade Muchachada Matiné, un roteiro audiovisual por Boiro no que se elaboraron 26 pezas para un mapa emocional sobre a Memoria Histórica da Rúa Principal.

Memoria histórica de Boiro para a Muchachada Matiné

O noso centro vai participar nas actividades que organiza o Festival audiovisual escolar Olloboi. Trinta rapaces do noso obradoiro do Club do Antifás acudirán ó roteiro socio-audiovisual que se organiza na Rúa Principal e terán que facer pezas relacionadas co tema que propoñen desde a organización (Olloboi e Unión de Muchachas).

O noso dire fixo unha presentación falando das persoas ás que se rende tributo no monumento da rotonda de Espiñeira, heroes e mártires da República que morreron durante a Guerra Civil.

Ruta Translatio

O martes 30 de maio recrearemos parte do camiño que supostamente fixeron os restos do Apóstolo Santiago, de acordo co que conta o Códice Calixtino.

Partimos de Cabo de Cruz en barco e paramos na Illa de Cortegada, onde nos fixeron unha (breve) visita guiada de contido histórico e biolóxico. Fomos logo ás Torres de Catoira para fondear (algúns, ó cabo), en Pontecesures. Desde alí camiñamos a Iria Flavia.

O noso obxectivo é facer unha revisión crítica desta peregrinación; para isto gravamos varias escenas coas que faremos cinco pequenas pezas documentais. Deixámosvos un álbum de fotos da saída e, máis abaixo, o tríptico que elaboramos para a saída.

Ruta Translatio (30 maio 2017)

 

 

 

Letras Galegas 2017

Como o ano pasado, neste curso tivemos unha completísima xornada celebrando as Letras Galegas, que este ano se outorgaron a Carlos Casares.

Pola mañá puidemos ver as obras de teatro que preparou o Obradoiro Bolaño: unha peza de Carlos Casares (As laranxas máis laranxas de todas as laranxas) e outra da gañadora do concurso de microtextos teatrais, Laura Alvarellos (Isto non é o que tiña planeado).

Ademais, celebramos a 2ª competición virtual STARgal, na que tivemos oportunidade de xogar ós videoxogos que elaborou o alumnado de 2º e 3º, ver como funcionaban as instalacións robóticas de 4º e valorar os booktrailers e videocontacontos que se fixeron para o concurso Máis que palabras (que cada ano organiza o Departamento de Galego).

Para quen quixo quedarse fixemos un xantar popular, con música en directo incluída; tralos postres, puidemos xogar ós xogos tradicionais que nos trouxo unha asociación de Santiago e, para rematar, asistimos á performance do actor Serafín Marcos.

Deixámosvos as fotos e os carteis para que vos fagades unha idea!

Letras Galegas 2017

a