Obradoiro de regueifas e batallas

O día 5 de febreiro, Manolo Maseda, un entendido no mundo das regueifas, veunos ensinar algo máis sobre este tradicional mundiño, o cal está estreitamente relacionado co que actualmente son as batallas de galos.

Foi un obradoiro moi ameno; xa que primeiro, catro alumnos sairon voluntarios a exhibirse “batallando´´ e logo “regueifando´´. Despois diso, Maseda comentounos algunha que outra diferenza entre estas dúas dinámicas. Para rematar o obradoiro dunha forma divertida, Manolo e o seu acordeón fixeron unha instrumental para que alumnos e profesores puidesemos sacar os nosos dotes regueifeiros. Pasámolo moi moi ben!

Lois Cespón

Aquí vos deixamos o resultado da sesión

Encontro do alumnado de 2º coa escritora Eva Mejuto

O martes, 27 de febreiro veunos  visitar Eva Mejuto, a autora do libro 22 segundos. O encontro foi no salón de actos da Cachada. A autora contounos como foi o proceso de creación desta novela, dende que comezou o libro ata que o rematou. Neste libro trátase o tema da transexualidade e falounos das vivencias de moitos rapaces e rapazas trans que están a experimentar este proceso. Para o seu libro, Eva  inspirouse nun rapaz que ela coñece chamado Marcos. Ensinounos cousas sobre a vida, fixémoslle algunha que outra pregunta e finalmente adicounos os libros. Pasámolo moi ben e estivemos un rato moi agradable xuntos e aprendendo.

Lucía Rodríguez

Obradoiro de videopoesía

O pasado mércores, 21 de febreiro, os alumnos e alumnas de 3º e 4º tiveron a oportunidade de asistir a un obradoiro de videopoemas.  

A actividade organizouna o departamento de Lingua galega e foi levada a cabo pola poeta e actriz Antía Otero; co fin de inspirar ao alumnado para crear videopoemas que serán presentados ao concurso “máis ca palabras” que promove este departamento.

Neste obradoiro non só tiveron a oportunidade de facerlle preguntas a Antía Otero, senón que tamén interpretaron poemas, traballaron coas ferramentas audiovisuais e cos recursos literarios e repasaron os vínculos que unen a poesía co vídeo; aprendendo así a transmitir sentimentos a través de imaxes e palabras.

Alicia Guijas

Excursión 4º Museo do Mar e Pergamiño Vindel

Os alumnos de 4º foron o martes 23 a Vigo a ver o Pergamiño Vindel co departamento de música, e o Museo do Mar e o acuario con os alumnos da optativa de Cultura Científica.

Puideron ver o famoso Pergamiño Vindel, que normalmente gárdase en Nova York, pero trouxérono uns días a Galicia. Pasárono moi ben interectuando cas ferramentas coas que se escribían pergamiños, papiros…

No acuario viron as especies que podemos encontrar na ría de Vigo, incluíndo dende maragotas ata quenllas.

Excursión 4ºESO Concerto ”As Lollipops”

O pasado martes 23 o alumnado de 4º foron a Santiago a escoitar un concerto en directo das Lollipops co departamento de música.

O grupo está formado por 3 mulleres e un pianista. Éstas cantan un pouco de todos os estilos, pero especialmente dos anos 50. Ademais fixeron varios xogos co público para facelo máis interactivo. Ensináronnos o estilo musical daquela época e descubrimos varias cancións que descoñecíamos.

volve o “Máis ca palabras”

Un ano máis, sae a convocatoria do concurso literario “Máis ca palabras” que promove o departamento de Lingua Galega e Literatura. Desta vez, as modalidades nas que poderedes participar son catro: videopoemas, booktrailers, regueifas e batallas. Como novidade, este ano vanse realizar diversos obradoiros previos que vos axudarán coas vosas creacións. Así, no mes de febreiro realizaranse os de videopoesía, regueifas e batallas. O único requisito para asistir a eles é que vos comprometades a presentar logo as vosas obras a este concurso literario. Animádevos!!

Podes consultar as bases 2018 aquí

Minas de San Fins e Bosque de Lousame

Hoxe luns o alumnado de 2º fixo unha visita ó Museo das Minas de San Fins e ó Bosque de Lousame. A actividade estivo organizada polos departamentos de Galego, Tecnoloxía e Física e Química, e enmárcase dentro do proxecto A Roda do Ano no que todo o centro participa baixo o lema de “adicar tempo ó noso entorno e á nosa xente”.

No Museo de San Fins coñecimos a historia da explotación mineira de bronce, estaño, volframio; as excavacións remóntanse á Idade de Bronce e perpetúanse ata hoxe en día, non exentas de polémica relativa ás consecuencias medioambientais da actividade industrial.

O Bosque de Lousame foi recoñecido este ano polo Programa das Nacións Unidas de Medio Ambiente como Área Conservada por Comunidades Locais por contribuír á recuperación ambiental dunha zona de monte ata fai pouco dominada por acacias e eucaliptos (unha das 7 únicas áreas de Europa). A través do programa Montescola o alumnado, guiado polo enxeñeiro de montes e a educadora ambiental da Aula da Natureza, tivo ocasión de identificar as especies autóctonas e exóticas presentes no monte de Froxán e mesmo de prantar cadanseu castiñeiro.

Para complementar a actividade, o alumnado cubriu, para Tecnoloxía, esta ficha con información útil. A noticia cubriuna El Correo Gallego.

Galería de fotos en Flickr:

 
San Fins e Lousame

Este nadal regala tempo

Durante os meses de novembro e decembro, o noso alumnado estivo traballando nun regalo para un macro Amig@ Invisible.

Aproveitando o temario de materiais, a xente de 2º fixo un xoguete de madeira e metal con elementos reciclados, e a de 3º un regalo téxtil. Así contribuímos a loitar contra o consumismo navideño e os consecuentes estereotipos de xénero (mirade o lapiceiro ganchillado de Jaime ou a carteira de Alan).

O alumnado de 1º fixo un pequeno agasallo nas Titorías, e o de 4º un marcapáxinas en Relixión e Alternativa.

Para obter un código co cal se emparellaban os Amigos Invisibles, cada alumna/o e profe tiveron que cubrir unha enquisa coa que realizaremos un estudo sobre uso do móbil.

Antes de entregar o agasallo, xa co seu código rexistrado, todo o alumnado pasou por unha instalación elaborada polo alumnado de Tecno de 4ºAB: unha porta ó futuro con raios láser que había que esquivar, e unha árbore de nadal feita con contadores da luz na que había que atinar unha combinación para poder acendela.

O espírito: tomar tempo para adicárnolo a nós, á nosa xente, ó noso medio. O Correo Gallego recolleu a noticia. Botade un ollo ó álbum de Flickr:

Este nadal regala tempo